2 Tawarikh 28

Iatu Ahas duangpulomo taunna, tonna dadi datu; anna ma’parenta sangpulo annan taunna lan Yerusalem. Tae’ napogau’i tu apa malolo dio pentiroNa PUANG, susi Daud nene’ to dolona,

sangadinna unturu’ bate lalanna mintu’ datu Israel, sia nagaragan dukapa rapang-rapang dipodeata dipati’no’ tu mintu’ Baal.

Ondongpi memala’ diong lombok Ben-Hinom sia natunu tu mai anakna muane susi penggauran megallianna mintu’ bangsa tu Naula’i PUANG dio mai tingayona to Israel.

Memala’ sia untunu pemala’ dao inan madao, dao tanete sia diong lu mintu’ garonto’ kayu maluna.

Iamoto Nasorongi PUANG, Kapenombanna, tama limanna datu Aram, naurunganni untaloi sia narampa buda tu mai taunna, anna solanni lako Damsyik. Sia disorong duka tama limanna datu Israel, tu umpandasai natalo.

Iatu Pekah, anakna Remalya, umpatei tau saratu’ duangpulo sa’bu lan sangallori, surodadu malinta’ nasang, belanna untampemo PUANG, Kapenombanna nene’ to dolona.

Na Zikhri, misa’ pa’barani dio mai Efraim, umpatei Maaseya, anakna muane datu, Azrikam, pangulu tongkonan layuk sia Elkana, akkele’na datu.

Na iatu mai siulu’na narampa to Israel duaratu’ sa’bu tu baine sia iatu pia muane sola baine sia naala tu pangrampa buda dio mai tau iato mai anna baai lako Samaria.

Apa den dio tu misa’ nabinNa PUANG, disanga Oded. Malemi tu Oded umpessitammui surodadu, tu male lako Samaria sia ma’kada lako nakua: Manassa belanna kare’dekanNa PUANG, Kapenombanna nene’ to dolomi, lako Yehuda, Nasorongi tu tau iato mai tama kuasammi, apa mipasiapanan mipatei situang kamasa’garammi, naurungan sumpu langngan langi’ tu sarrona.

Sia totemo misangamo mipandasa tu tau dio mai Yehuda sia dio mai Yerusalem susi kaunan muane sia kaunan baine. Apa tae’ dukaraka nakapua kasalammi lako PUANG, Kapenombammi?

Iamoto perangiina’ te pissanna te: la mipasule tu mintu’ tau dirampa, tu mirampa dio mai mintu’ siulu’mi, belanna nata’paimokomi tu kare’dekan ara’Na PUANG.

Attu iato bendanmi ba’tu pira-pira tau dio mai pangulunna to Efraim, iamotu Azarya, anakna Yohanan, Berekhya, anakna Mesilemot, Yehizkia, anakna Salum sia Amasa, anakna Hadlai, male umbalii tu mintu’ to sule dio mai kasirarian,

sia ma’kada lako tau iato mai nakua: Da misolanni mai tu to dirampa, belanna iatu tanan penaammi tapokasalan dio oloNa PUANG sia umpamakamban kasalanta sia gau’ kadaketa; inang makambanmo tu gau’ kadaketa sia tuomo tu kasengkean unta’pai to Israel.

Attu iato napopa’elo’nami mintu’ to ma’pa’buno tu mintu’ to dirampa sia mintu’ pangrampa lako mintu’ pangulu sia mintu’ to buda.

Ke’de’mi tu mintu’ muane mangka disa’bu’ sanganna, anna tundui tu to dirampa; iatu mai to ma’kambelang napakei pakean pangrampa, napapakei sia nalapikki tu lentekna, napakande sia napairu’ sia nauru’ minna’; sia iatu to tang nakulle ma’lingka napalangngan keledai, anna baai tu tau iato mai lako Yerikho, Kota Koroma, lako mintu’ siulu’na; mangkato sulemi lako Samaria.

Attu iato mesuami tu datu Ahas lako tu mai datu Asyur umpalaku pa’tunduan.

Ondongpi sae duka tu to Edom untalo to Yehuda, anna male urrampai tu tau pira.

Sia iatu to Filistin ullaoi mintu’ kota dio Padang Merrantena sia Padang Rampe sau’ lan lili’na Yehuda; Natalomo tu Bet-Semes, Ayalon, Gederot, Sokho sia mintu’ tondok lan lili’na, Timna sia mintu’ tondok lan lili’na, Gomzo sia mintu’ tondok lan lili’na, anna pa’tondokki dio.

Belanna Napamadiongammo PUANG tu to Yehuda napobua’ Ahas, datu Israel, belanna ussede to Yehuda palutu tombang sia mandu tang maruru’ unturu’ PUANG.

Saemi tu Tilgat-Pilneser, datu Asyur, umpentireke’i, apa nati’tin, tae’ natundui.

Belanna moi nalo’bangimo Ahas tu banuanNa PUANG sia banuanna datu sia banuanna mintu’ pangulu, nasorongi tu mintu’nato lako datu Asyur, apa inang tae’ natundui.

Iatonna lan kapussakanna, datu Ahas ia duka bangsiato, tu tontong tang maruru’ lako PUANG.

Belanna memala’ lako deata Damsyik, tu untaloi, belanna natangnga’ kumua: Iatu deatanna mintu’ datu Aram mangka untundui; lako kalena la kunii memala’, anna tundui dukana’. Apa iamo napobannang anna tobang rokko kasanggangan sola mintu’ to Israel.

Narampunmi Ahas tu mintu’ pareanan banuanNa Puang Matua, anna tesse-tessei; sia natutu’ tu mintu’ ba’ba banuanNa PUANG, anna garaganni kalena tu inan pemalaran, napadio mintu’ tetuk Yerusalem.

Sia lan mintu’ kota Yehuda nagaragai tu inan madao, la nanii untunu pemala’ lako deata senga’. Sia napa’dikki tu penaanNa PUANG, Kapenombanna nene’ to dolona.

Iatu tang dipokadannapa tu mintu’ tuna’na, tu dolona sia iatu undinna, manassa tisura’mo lan sura’na mintu’ datu Yehuda sia Israel.

Iatu Ahas malemo tama batu dilobang sola nene’ to dolona, anna dipeliang lan kota, lan Yerusalem, apa tae’ napatamai tau liangna mintu’ datu Israel. Na Hizkia, anakna muane, ussondai dadi datu.